काठमाडौं । जनता समाजवादी पार्टी नेपालका अध्यक्ष उपेन्द्र यादवले पार्टी पुनर्गठनको तयारी गर्नुभएको छ ।

केन्द्रीय समिति र कार्यकारिणी समिति पुनर्गठन गरी जसपा संघीय परिषद्का अध्यक्ष डा.बाबुराम भट्टराईसहित उहाँका पक्षमा लागेका नेताहरुको नाम हटाउने तयारी भइरहेको छ ।

उपेन्द्र यादवको अध्यक्षतामा वीरगञ्जमा आयोजित केन्द्रीय समिति बैठकमा सहभागी एक केन्द्रीय सदस्यका अनुसार अधिकांश केन्द्रीय सदस्यले पार्टीमा गैरजिम्मेवार काम गर्ने नेता तथा कार्यकर्तालाई कारवाही गर्नुपर्ने माग राखेका छन् । सोही अनुसार अध्यक्ष यादव पार्टी पुनर्गठनको तयारीमा जुटेको बताइएको छ ।

बाबुराम पक्षका नेताहरुलाई केन्द्रीय समिति तथा कार्यकारिणीबाट हटाएपछि कारवाही सरह नै हुन्छ । यद्यपि पार्टीको आधिकारिक निर्णय साँझसम्म आउने ती नेताले बताएका छन् । बैठकमा बोल्ने क्रम जारी छ । बैठकमा सहभागी अधिकांश नेताले बाबुराम पक्षका नेताहरुलाई कारवाही गर्न अध्यक्ष यादवलाई दबाब दिइरहेका छन् ।

यता, बुधबार सम्पन्न बाबुराम पक्षको केन्द्रीय समितिको बैठकमा पनि पार्टी पुनर्गठनको माग उठेको थियो । रुपान्तरणका लागि पार्टीलाई पुनर्गठन गर्नुपर्ने सुझाव नेताहरुले दिएका थिए । वीरगञ्जमा जारी बैठकले के निर्णय गर्छ, त्यसको आधारमा जसपाको बाबुराम पक्ष अगाडि बढ्ने नेताहरुले बताएका छन् ।