काठमाडौं । सिके राउत नेतृत्वको जनमत पार्टीले राष्ट्रपति विद्यादेवी भण्डारीले नागरिकता विधेयक प्रमाणीकरण नगरेर नागरिकताको अधिकार खोसिएको भन्दै आन्दोलनको घोषणा गरेको छ ।
पार्टीले आज विज्ञप्ति जारी गर्दै केन्द्रीय कार्यकारिणी समितिको बैठकले गरेको निर्णय अनुसार नागरिकता विधेयक प्रमाणीकरण नगरेर राष्ट्रपतिले नागरिकताको अधिकार खोसेको भन्दै त्यसविरुद्ध आन्दोलनको घोषणा गरेको जानकारी दिएको छ ।
साथै उसले सरकारविरुद्ध पनि आन्दोलनको घोषणा गरेको छ । सरकारले किसान आन्दोलनका मागहरू सम्बोधन नगरेको भन्दै वडास्तरदेखि नै आन्दोलनका कार्यक्रमहरू घोषणा गरेको हो ।
जस अनुसार असोज १० गते घटस्थापनाका दिन हरेक वडामा शुभकामना दिँदै नागरिकता अधिकार खोसिएको बारे माइकिङ गरिने जनमत पार्टीले जानकारी दिएको छ ।
असोज ११ गतेदेखि १८ गतेसम्म वडास्तरमा बिहान र दिउँसो किसान आन्दोलन र नागरिकता विधेयकबारे अन्तरक्रिया कार्यक्रम गरेर टोलमा र्याली गर्दै स्थानीय चोक–चोकमा विरोध प्रदर्शन र कोणसभाको आयोजना गरिनेछ ।
साथै दसैंको टिकाको दिन अर्थात् असोज १९ गते किसान आन्दोलनका मागहरू पूरा नगर्ने सरकार र नागरिकता विधेयक प्रमाणीकरण नगर्ने राष्ट्रपतिको पुत्ला दहन गर्ने कार्यक्रम जनमत पार्टीले राखेको छ ।
