काठमाडौं ।म्याग्दीमा सामाजिक सञ्जालमार्फत एमालेका उमेद्वारलाई मत माग्ने मतदमन अधिकृत जिम्मेवारी मुक्त भएका छन् ।

सामाजिक सञ्जाल फेसबुकमा नेकपा एमालेका उमेदवार हरिकृष्ण श्रेष्ठका लागी मत माग्ने मतदान अधिकृत नविन कार्कीलाई जिम्मेवारी मुक्त गरीएको हो ।

कार्कीलाई म्याग्दीको धवलागिरी गाउँपालिका–५ को महेन्द्र आधारभूत विद्यालय मतदान केन्द्रमा मतदान अधिकृत तोकिएको थियो ।

कार्कीले आज बिहान प्रतिनिधि सभा सदस्यमा एमालेका उमेदवार श्रेष्ठलाई मतदान गरेर जिताउन अपिल गरिएको डिजिटल पोष्टर आफ्नो फेसबुक पेजमा सेयर गरेका मुख्य निर्वाचन अधिकृतको कार्यालयले जनाएको छ ।

कार्कीको फेसबुकको स्कृनसर्ट सहित नेकपा माओवादी केन्द्रका प्रतिनिधिले मुख्य निर्वाचन अधिकृतको कार्यालय अन्तरगतको जिल्ला आचार संहिता अनुगमन समितिलाई उजुरी दिएका थिए ।

त्यसपछि आचार संहिता अनुगमन समितिको बैठकबाट कार्कीलाई मतदान अधिकृतबाट जिम्मेवारीमुक्त गर्ने निर्णय भएको मुख्य निर्वाचन अधिकृत कृष्णप्रसाद नेपालले जानकारी दिनुभयो ।

कार्कीलाई हटाएपछि सोही केन्द्रका सहायक मतदान अधिकृत विष्णुप्रसाद पौडेललाई मतदान अधिकृतको जिम्मेवारी दिइएको छ ।