काठमाडौं । नेपाली कांग्रेसका महामन्त्री एवम् काठमाडौं क्षेत्र नम्बर ४ का नवनिर्वाचित प्रतिनिधि सभा सदस्य गगनकुमार थापाले अब संसदीय दलको निर्वाचनको तयारीमा लाग्ने बताउनुभएको छ ।
निर्वाचन मतपरिणाम घोषणा भए लगत्तै सम्बोधन गर्दै थापाले भन्नुभयो, ‘संसदीय दलको निर्वाचनको तयारीमा आजैदेखि लाग्छु । मतदाताको मनमा के छ । मनको कुरा पनि व्यक्त गर्नुभएको छ । त्यो पूरा गर्नुपर्छ ।’
उहाँले अहिले जनताले स्थायित्व मात्रै नभई नेपाललाई हाँक्ने नयाँ चालक पनि खोजेको बताउनुभयो । ‘त्यो चालक कांग्रेसभित्रै छन् । यो बहस पार्टीभित्र पनि भइसकेको छ । कांग्रेसले नयाँ नेतृत्व दिन जरुरी छ । देशभरबाटै यो विचार व्यक्त भएको छ,’ उहाँले भन्नुभयो।
काठमाडौं ४ बाट २१ हजार ३०२ मतका साथ विजयी हुनुभएका थापाले मतदाताको विश्वासमाथि घात नगर्ने वाचासमेत गर्नुभएको छ । उहाँले मतदाताले दिएको जिम्मेवारी इमानदारिताकासाथ पूरा गर्ने बताउनुभयो।
यसैबीच, उहाँले यो निर्वाचनमा गठबन्धनले नै बहुमत पाउने र गठबन्धनकै सरकार बन्ने दाबी गर्नुभयो। तर, सबै कुराको अहिले नै विश्लेषण गर्न हतार हुने बताउनुभयो । ‘गठबन्धनले बहुमत प्राप्त गर्छ । सरकार बन्छ । सरकार बन्ने बित्तिकै राम्रो हुँदैछ भन्ने विश्वास दिलाउनु पर्नेछ । यो हाम्रोसामु चुनौती छ।’
यसपटक नागरिकले मतसँगै आक्रोश पनि व्यक्त गरेको उहाँको भनाइ छ ।
