एजेन्सी। पेरिस सेन्ट जर्मेन लिग वानमा चिरप्रतिद्वन्द्वी मार्सेसँग पराजित भएको छ । इन्जुरी समयमा भएको झडपमा नेयमारसहित पाँच जना खेलाडीले रातो कार्ड पाउँदा पिएसजी पराजित हुनपुग्यो ।

फ्लोरियान थाउभिनले खेलको एक मात्र गोल गरेपछि पीएसजी सन् १९८४–८५ पछि पहिलोपटक लिगमा शुरुवाती दुई खेल हार्न पुग्यो ।
खेलको अन्त्यतिर दुई टोलीका खेलाडीहरु बीच झडप भएको थियो ।

जसमा पिएसजीका नेयमारसहित लेभिन कुरुजावा, लियोनार्डो पारेडेस तथा मार्सेका जोर्ड अमाभी र डारियो बेनेडेट्टोले रातो कार्ड पाए । भीएआरमा रेफ्रीले जाँच गर्दा नेयमारले विपक्षी खेलाडीलाई मुक्का हानेको देखिएको थियो ।

यता, नेयमारले भने आफूमाथि मार्सेका खेलाडीले रंगभेदी टिप्पणी गरेको आरोप लगाए । खेलपछि आरोपबारे मार्सेका म्यानेजर आन्द्रे भिल्ला बोआसले भने, ‘फुटबलमा रंगभेदको कुनै स्थान छैन तर मलाई लाग्दैन कि यहाँ यस्तो भएको छ । यद्यपि हामी यसबारे छानबिन गर्छौं ।’

इन्जुरी समयमा मार्सेका बेनेडेट्टोले पीएसजीका पारेडेसलाई पछाडिबाट धक्का दिएपछि दुई टोलीबीच झडप भएको थियो । त्यसलगतै पाराडेसले बेनेडेट्टोमाथि मुक्का प्रहार गरेका थिए भने अल्भारोलाई हेडबट गरेका थिए ।