काठमाडौं । सर्वोच्च अदालतको फैसलाको पूर्ण पाठ आइनसकेको बहाना बनाएर मुख्यमन्त्री तथा मन्त्रिपरिषद्को कार्यालयका कर्मचारीले एमाले संसदीय दलका नेता हिक्मतकुमार कार्कीलाई कमचलाउ मुख्यमन्त्रीको रूपमा पद बहाल गराउन अटेर गरेका छन् ।

सर्वोच्चको आदेशसँगै आफू कामचलाउ मुख्यमन्त्री भएको दाबी गर्दै कार्की मुख्यमन्त्री कार्यालय जाने तयारीमा थिए । तर, पूर्णपाठ नआएको भन्दै मुख्यमन्त्री कार्यालयका कर्मचारीले पद बहाल गर्ने तयारी नगरेपछि कार्की मन्त्रालय नगई निवासमा गएका छन् ।

कार्की आजै काठमाडौंबाट विराटनगर गएका थिए । कार्की विराटनगर आउँदा मुख्यमन्त्री कार्यालयले गाडीसमेत पठाएको थिएन ।

कार्की एमाले संसदीय दलको नेताको रूपमा दिइएको गाडी लिएर निवास गएका छन् । उनीसँगै आएका तत्कालीन सामाजिक विकासमन्त्री बुद्धिकुमार राजभण्डारीलाई समेत मन्त्रालयले गाडी पठाएको थिएन ।