काठमाडौं । सिनामंगलबाट बरामद भएको ६० किलो ७१६ ग्राम सुन तस्करीमा संलग्न गिरोहसँग कनेक्सन देखिएपछि प्रहरीको केन्द्रीय अनुसन्धान ब्युरो (सीआईबी) ले पूर्वउपराष्ट्रपति नन्दबहादुर पुनका छोरा दीपेश पुनसँग सोधपुछ गरेको छ ।
सीआईबीले दिउँसो उनलाई बोलाएर सोधपुछ गरेको हो । सुन तस्करीमा जोडिएको चिनियाँ मूलका बेल्जियन नागरिक दावा छिरिङसँग पूर्वउपराष्ट्रपति परिवारको सम्पर्क सम्बन्ध सार्वजनिक रुपमा नै देखिएको छ । त्यसैले यो तस्करी प्रकरणमा दीपेश पनि प्रहरी अनुसन्धानको दायरामा आएका हुन् ।
दावा छिरिङसँग दीपेशको व्यापारिक साझेदारी नै रहेको कतिपय रिपोर्टहरू आइरहेका छन् । छिरिङले रोल्पाकी अमला रोकामगरसँग विवाह गरेका छन् । त्यही सम्बन्धको आधारमा पुनको परिवार र छिरिङबीच उठबस छ । छिरिङसहित चिनियाँ टोलीलाई लिएर दीपेश गोसाइँकुण्डसम्मको हवाई यात्रामा गएको पनि सार्वजनिक भएको थियो ।
