काठमाडौं । कोशी प्रदेशको राजनीतिक समीकरणले कुनैपनि दलको सरकार नबन्ने भएपछि समस्या उत्पन्न भइरहेको छ । अवैधानिक रुपमा सरकार गठन गर्न खोज्दा सर्वोच्च अदालतले दुई–दुई पटकसम्म बदर गरिदिएपछि अबको राजनीतिक राजनीतिक बाटो के हुने भन्नेमा दलहरू अन्योल बनेका छन् । तत्कालीन समयमा केन्द्रमा एमाले माओवादीको समीकरण ताका संविधानको धारा १६८ को उपधारा १ बमोजिमको सरकार नबन्ने भएपछि उपधारा २ अन्तर्गतको सरकार बनेको थियो । त्यतिबेला एमाले संसदीय दलका नेता हिक्मत कार्की मुख्यमन्त्री बन्नुभयो । दुई महिना नबित्दै संघमा तुहिएको समीकरणका कारण ६ वटा प्रदेशमा सहजैले सरकार बन्दा कोशी विवादित बन्दै आएको छ । अहिले संविधानको धारा १६८ को उपधारा ३ अन्तर्गतको सरकार बनेको छ । जसमा ठूलो दलको हैसियतले नेकपा एमाले कोशी प्रदेश संसदीय दलका नेता हिक्मत कार्की मुख्यमन्त्री बन्नुभएको छ । मुख्यमन्त्री कार्कीले आफ्नो केन्द्रीय नेतृत्वबाट सहमतिका लागि जुनसुकै प्रयास गर्नेगरी अनुमति लिएको दाबी गर्नुभयो ।
कांग्रेस संसदीय दलका नेता उद्धव थापाले दुई पटक मुख्यमन्त्रीको शपथ लिएपनि सर्वोच्चले बदर गरिदिएपछि पुनः सरकारको अनिश्चितता देखिएको छ । अहिलेको अवस्था कायम रह्यो र नेताहरूले विवेक पुर्याएनन् भने कार्की नेतृत्वको सरकारले पनि पूर्णता पाउने सम्भावना छैन । जसका लागि केन्द्रीय नेताहरू सकारात्मक हुनुपर्ने देखिन्छ । प्रदेशमा अधिकार पनि खोज्ने तर स्वविवेकको निर्णय लिन नसक्ने दलका नेताहरूका कारण कोशी अन्योलमा परेको छ । यता, माओवादी केन्द्रका नेता, पूर्व सभामुख एवं मन्त्री बाबुराम गौतमले अहिलेसम्म भएका सबै क्रियाकलाप गलत बाटोमा गएको बताउँदै अब सहमति खोजिनुपर्नेमा जोड दिनुभयो ।
अब भने कोशी सरकारले विश्वासको मत नपाए संविधानको धारा १६८ को उपधारा ५ बमोजिमको सरकारका लागि आह्वान हुनेछ जसमा प्रदेशसभाभित्र रहेका प्रदेशसभा सदस्यहरूले आफू बहुमत जुटाउन सक्ने भन्दै दाबी पेश गर्नेछन् । त्यसको ३० दिनभित्र विश्वासको मत लिइसक्नुपर्ने हुन्छ । यद्यपि सो अवधिमा विश्वासको मत लिन सकिएन भने मध्यावधि निर्वाचनको बाटो तय हुनेछ । राजनीतिक विश्लेषक मुमाराम खनालका अनुसार जनताको म्याण्डेड भन्दा पनि राजनीतिक सहमति महत्त्वपूर्ण भएको बताउनुभयो । उहाँले विभाजन रोक्न सबैको उत्तिकै भूमिका हुनुपर्नेमा जोड दिनुभयो ।
यतिबेला कोशी प्रदेशका प्रदेशसभा सदस्यहरूले विवेक पुर्याउन जरुरी देखिएको छ । त्यहाँको राजनीतिक अस्थिरताका कारण सडकका वैकल्पिक शक्तिहरूलाई मलजल गरिरहेको देखिन्छ र यसले जनतामा प्रत्यक्ष वितृष्णा पैदा गरेको छ । विभिन्न तवरले जातीय, धार्मिक, साम्प्रदायिक हिंसा भड्काउन उद्धत दलहरू एकदिन आफ्नै पासोमा पर्ने खतरा बढ्दै गएको छ ।
