काठमाडौं । अर्थमन्त्री प्रकशशरण महतले जाजरकोट भूकम्प प्रभावित क्षेत्रमा भौतिक संरचना पुनर्निर्माण गर्न करिब ७५ देखि ८० अर्ब रुपैयाँ खर्च हुने प्रारम्भिक अनुमान गरिएको बताउनुभएको छ ।

ललितपुरमा आयोजित जाजरकोट रामीडाँडा भूकम्प प्रभावित क्षेत्रको पुनर्निर्माणसम्बन्धी बृहत् अन्तरक्रिया कार्यक्रममा मन्त्री महतले भौतिक संरचना पुनर्निर्माणका लागि सरकारले हाल १० अर्ब रकम छुट्याएको उल्लेख गर्नुभएको हो ।

तत्काल अस्थायी आवासका लागि सरकारले ५० हजार रुपैयाँ उपलब्ध गराउने निर्णय गरेको पनि उहाँले जानकारी दिनुभयो । सो रकम छिटो नै स्थानीय तहमा पुग्ने उहाँले बताउनुभयो ।

हालको स्रोतले भौतिक संरचना पुनर्निर्माणको लागि अपुग भएको उहाँको भनाई थियो । आफ्नो स्रोतबाहेक अन्य क्षेत्रबाट पनि रकम जुटाउन पहल भइरहेको मन्त्री महतले बताउनुभयो ।

भौतिक संरचना निर्माण गर्दा वातावरण मैत्री, पुरानो शैलीमा नयाँ प्रविधिको घर निर्माण गर्न उहाँले सुझाउनुभयो। सरकारले भूकम्प प्रतिरोध घर निर्माण गर्न पहल गर्ने उहाँले उल्लेख गर्नुभयो।