काठमाडौं । स्वास्थ्य तथा जनसंख्या मन्त्रालयले सबै सरकारी अस्पताललाई धरौटी रकम नलिइ कोरोना संक्रमितको उपचार गर्न निर्देशन दिएको छ ।

मन्त्रालयका प्रवक्ता डा. जागेश्वर गौतमले धरौटी माग्ने सबै अस्पताललाई स्पष्टीकरण सोधिएको जानकारी दिनुभयो ।

उहाँले सक्नेसँग शुल्क लिने र नसक्नेसँग निःशुल्क उपचार गर्ने मन्त्रालयको निर्णय यथावत् रहेको पनि बताउनुभयो ।

सरकारले कोरोना संक्रमितको सःशुल्क उपचार गर्ने निर्णय गरेसँगै विभिन्न अस्पतालहरूले बिरामीहरूको उपचार गर्नुपूर्व धरौटी रकम जम्मा गर्न सूचना निकालेका छन् ।

यसैबीच, कोरोनाका कारण मृत्यु भएका व्यक्तिको संख्या फरक परेको भन्दै सत्यतथ्य पत्ता लगाउन स्वास्थ्य मनत्रालयले तीन सदस्यीय समिति गठन गरेको छ ।

मृतकको संख्या फरक पर्न गएकोबारे सत्यतथ्य पत्ता लगाउन तीन सदस्य समिति बनाएको र समितिले काम थालिसकेको प्रवक्ता गौतमले जानकारी दिनुभयो ।

उक्त समितिमा स्वास्थ्य मन्त्रालयका सहसचिव, इपिडिमियोलोजी तथा रोग नियन्त्रण महाशाखाका प्रमुख तथा सिसिएमसीका एक चिकित्सक सदस्य रहेका छन् ।