काठमाडौं । कोरोना भाइरस जोखिम भत्ता नपाएपछि बुटवल धागो कारखानामा सञ्चालित कोरोना विशेष अस्थायी अस्पतालमा कार्यरत सातजना डाक्टरले राजीनामा दिएका छन् ।

अस्पतालमा करारमा कार्यरत सातजना मेडिकल अधिकृतले राजीनामा दिएपछि उपचार सेवा प्रभावित भएको छ । तीन महिनादेखिको जोखिम भत्ता नपाएको भन्दै उनीहरुले राजीनामा दिएका हुन् ।

लुम्बिनी प्रदेशको सामाजिक विकास मन्त्रालयले लुम्बिनी प्रादेशिक अस्पताललाई जोखिम भत्ता वापतको रकम पठाए पनि आफूहरुले नपाएको एक मेडिकल अधिकृतले बताए ।

डाक्टरहरुले राजीनामा दिएपछि सामाजिक विकासमन्त्री सुदर्शन बरालसँग पनि छलफल भएको र उहाँले तिहारपछि जोखिम भत्ता उपलब्ध गराउने प्रतिबद्धता जनाउनुभएको छ । तर डाक्टरहरु भने काममा फर्केका छैनन् ।