काठमाडौं । काठमाडौंका ह्याम्स लगायतका केही अस्पताल र निजी ल्यावहरुले पिसिआरको नक्कली रिपोर्ट दिने गरेको खुलेको छ ।

काठमाडौंको मण्डिखाटारमा रहेको ह्याम्स अस्पताल, सानेपामा रहेको स्टार अस्पतालले पिसिआरको नक्कली रिपोर्ट दिने गरेको भन्दै संस्कृति पर्यटन तथा नागरिक उड्यन मन्त्रालयले कोभिड १९ संकट ब्यवस्थापन केन्द्र र स्वास्थ्य मन्त्रालयलाई पत्र काटेर उनीहरुमाथि छानबिन गर्न र कारबाही गर्न समेत भनेको छ ।

यी अस्पतालले कोरोना पोजेटिभ रिपोर्ट आए पनि विदेश जानेहरुलाई नेगेटिभ दिने गरेको खुल्न आएको छ । नक्कली रिपोर्ट लिएर गएका यात्रुहरु हङकङ्ग र युएई पुगेपछि यी अस्पतालको रिपोर्टमाथि पर्यटन मन्त्रालयले छानबिन थालेको हो ।

त्यस्तै, सुरिया हेल्थ केयर, सेन्ट्रल डाइनोष्टिक ल्याबोटरीले पनि पिसिआरको नक्कली रिपोर्ट दिने गरेको खुल्न आएपछि अनुसन्धानका लागि पत्र नै काटेर पर्यटन मन्त्रालयले थप छानविन र कारबाही गर्न भनेको हो ।

यस्ता अस्पताल र ल्याबहरुकै कारण नेपाल एयरलाइन्स हङकङ्ग, युएईसहितका केही देशहरुमा उडान प्रतिबन्धमा परेको छ । पर्यटन मन्त्रालयले काटेको पत्रमा ह्याम्स, स्टारलगायतका यी ल्याबले स्वाब नै संकलन नगरी विदेश जानेहरुलाई रकम लिएर पिसिआर रिपोर्ट दिने गरेको पनि उल्लेख गरिएको छ ।