काठमाडौं । छैटौं संस्करणको नेपालगन्ज म्याराथनको उपाधि एपिएफ क्लबका गोपीचन्द्र पार्कीले जितेका छन् । नेपालगन्जमा आज भएको म्याराथनमा गोपीले उपाधि जितेका हुन् ।

उपाधिसँगै गोपी आगामी वर्ष जापानमा आयोजना हुने टोकियो ओलम्पिक खेलकुदका लागि छनोट भएका छन् ।

कोरोना भाइरसको महामारीको कारण अन्य प्रतियोगिता नहुँदा नेपाल ओलम्पिक कमिटी ९एनओसी०ले नेपालगन्ज म्याराथनको विजेताले ओलम्पिकमा सहभागिता गराउने निर्णय गरेको थियो ।

गोपी नेपालमा आयोजना भएको १३ औं सागका स्वर्ण विजेता खेलाडीसमेत हुन् । सागमा गोपीले ५ हजार मिटरको दौडमा स्वर्ण जितेका थिए ।

यस्तै, महिला हाफ म्याराथनको उपाधि एपिएफकी पुष्पा भण्डारीले जितिन् । निर्धारित दुरी १ घण्टा २६ मिनेट ५४ सेकेन्डमा पूरा गर्दै पुष्पाले उपाधि हात परेकी हुन् ।

कर्णाली प्रदेशकी मन्जु रावत १ घण्टा ३० मिनेट ७ सेकेन्डमा उक्र दूरी पार गर्दै दोस्रो भइन् । १ घण्टा ३८ मिनेट १४ सेकेन्डको समय सहित शर्मिला घर्तीले तेस्रो स्थान हासिल गरेकी छन् ।