काठमाडौं । संसद् सचिवालयले आजको बैठकमा अविश्वासको प्रस्ताव टेवल गर्ने तयारी गरेपछि नेकपा-ओली समूहले प्रदेश १ को प्रदेशसभा बैठक अवरुद्ध गर्ने भएको छ ।

आज दिउँसो २ बजे आह्वान गरिएको जारी सातौ हिउँदे अधिवेशनको तेस्रो बैठक सञ्चालन गर्न नदिने नेकपा ओली समूहका प्रमुख सचेतक बुद्धिकुमार राजभण्डारीले बताउनुभयो ।

यसअघि गत माघ २५ को बैठकमा अविश्वासको प्रस्ताव टेवल गर्ने कार्यसूची थियो । तर सत्तारुढ नेकपा ओली समूहले नै अवरोध गरेपछि सभामुख प्रदीपकुमार भण्डारीले आजसम्मका लागि बैठक स्थगित गर्नुभएको थियो ।

दल विभाजनले आधिकारिता पाएपछि मात्रै बैठक सञ्चालन गर्न मिल्ने राजभण्डारीको भनाइ छ । ओली पक्षले मुख्यमन्त्री शेरधन राईविरुद्ध अविश्वासको प्रस्ताव ल्याउने दाहाल–नेपाल समूहका १६ जना सांसदहरुलाई निलम्बन गर्ने निर्णय गरेको थियो ।

यता, नेकपा दाहाल–नेपाल समूहले आजको बैठकमा अविश्वासको प्रस्ताव टेबुल गर्नुपर्ने बताएको छ । उक्त समूहका नेता इन्द्र आङ्बोले प्रदेशसभा भङ्ग गर्ने अभिव्यक्ति दिँदै हिँड्ने सरकारसँग अनौपचारिक छलफलमा बस्नुपर्ने औचित्य नरहेको पनि बताउनुभयो ।

यसैबिच, नेपाली कांग्रेस प्रदेश सभाका प्रमुख सचेतक केदार कार्कीले भने सदन रोक्न नमिल्ने बताउनुभएको छ । सरकार पक्षले सदन रोक्न नमिल्ने बताउँदै उहाँले आजबाट निरन्तर रुपमा अघि बढ्नु पर्ने धारणा राख्नुभयो ।