काठमाडौं । भारतीय राष्ट्रिय क्रिकेट टालीका पूर्वसदस्य गौतम गम्भीरले दिल्ली क्यापिटल्सले इण्डियन प्रिमियर लिग (आइपिएल)मा यो वर्ष नेपाली क्रिकेटर सन्दीप लामिछानेलाई अनुबन्ध नगरेकोमा आश्चर्य प्रकट गरेका छन् । गत बिहीबार चेन्नईमा सम्पन्न आपिएलको अक्सनबाट दिल्लीले अष्ट्रेलियन खेलाडी स्टिभ स्मिथलाई अनुबन्ध गरेकोप्रति गम्भीरले आश्चर्य जनाएका हुन् । उनले आफूलाई दिल्लीले अक्सनबाट स्मिथलाई अनुबन्ध गर्छ भनेर यसअघि नसोचेकोसमेत बताएका छन् ।

गम्भीरले दिल्लीसँग माथिल्लो क्रममा ब्याट्सम्यान प्रशस्त भएको बताउँदै स्टार स्पोट्ससँगको कुराकानीमा भने, ‘यसले गर्दा स्मिथले टिममा पोजिसन नै पाउन मुश्किल परेको छ ।’

स्मिथ व्याट्सम्यान भएकाले दिल्लीलाई प्लेइङ–११ मा उनलाई समावेश गर्न गाह्रो हुने गम्भीरको तर्क छ ।

‘टिमसँग अलरेडी माथिल्लो क्रममा उत्कृष्ट ब्याट्सम्यान छन्,’ उनले भने, ‘दिल्लीसँग माथिल्लो क्रममा शिखर धवन, पृथ्वी शाँ, अजिन्क्य रहाणे, श्रेयस ऐय्यर र ऋषभ पन्त छन् । यस्तो अवस्थामा स्मिथलाई प्लेइङ –११ मा उपयुक्त स्थान दिन दिल्लीलाई गाह्रो हुनेछ ।’

दिल्ली क्यापिटल्सका पूर्वकप्तानसमेत रहेको गम्भीरले योपटक दिल्लीको रिस्ट स्पिन पक्ष कमजोर देखिएकोसमेत बताएका छन् ।

साथै, उनले अमित मिश्राको फिटनेस कमजोर रहेकाले दिल्लीले सन्दीपलाई प्राथमिकतामा राखेको भए उपर्युक्त हुने पनि बताए ।
‘दिल्लीले नेपाली लेगस्पिनर सन्दीप लामिछानेलाई रिलिज गर्नुहुन्थ्यो’, उनले दाबी गर्दै भने, ‘अक्सनबाट स्मिथको स्थानमा स्पिनरलाई अनुबन्ध गरेको भए दिल्ली झन् मजबुद देखिन्थ्यो ।’

मिश्राले चोटकै कारण गत सिजनको आइपिएलमा तीन खेल मात्र खेल्न पाएका थिए । यो पटक पनि उनको फिटनेसलाई लिएर गम्भीरले प्रश्न उठाएका छन् ।

दिल्लीले योपटक स्मिथसँगै साम बिलिङ्स, टम करन, उमेश यादव, एम सिद्धार्थ, रिपल पटेल, विष्णु विनोद र लुकमान हुसेन मेरीवालालाई अनुबन्ध गरेको छ ।

दिल्ली गत सिजनको आइपिएलमा पहिलोपटक फाइनलसम्म प्रवेश गरेको थियो । तर, फाइनलमा भने उ मुम्बईसँग पाँच विकेटले पराजित भएको थियो ।