काठमाडौं । नेकपा एमालेका वरिष्ठ नेता झलनाथ खनाल र माधवकुमार नेपाल पक्षको राष्ट्रिय कार्यकर्ता भेला आजदेखि सुरु भएको छ । ललितपुरको सानेपास्थित हेरिटेज गार्डेनमा राखिएको भेला बिहीबारसम्म चल्ने छ ।

नेकपा एमालेका अध्यक्ष केपी शर्मा ओलीले इतर पक्षलाई पेलेर जाने रणनीति अख्तियार गरेपछि खनाल–नेपाल समूहले समानान्तर गतिविधि अगाडि बढाएको जनाएको छ ।

ओली पक्षले खनाल–नेपाल पक्षको भेलामा सहभागी हुनेलाई कारबाहीको चेतावनी दिए पनि देशभरबाट नेता कार्यकर्ताको उल्लेख सहभागिता रहेको छ भने भेला स्थलमा चहलपहल बढेको छ ।

नेता-कार्यकर्तालाई ११ जना स्थायी समिति सदस्यद्वारा आइतबार जारी गरिएको विज्ञप्ति वितरण गरिएको छ । कार्यक्रम परिसरमा कम्युनिस्ट नेताहरु र एमालेका संस्थापक नेताहरुको तस्बिर राखिएको छ ।

भेला ११ बजेबाट भेला सुरु हुने भनिए पनि औपचारिक रुपमा सुरु हुन भने ढिलाइ भएको थियो ।

भेलास्थलमा प्राथमिक उपचारको प्रबन्ध मिलाइएको छ । कार्यक्रम दुई सत्रको रहने बताइएको छ । पहिलो सत्रमा उद्घाटन र दोस्रोमा बन्द सत्र रहनेछ ।

भेलाको अध्यक्ष्यता वरिष्ठ नेता झलनाथ खनालले गर्दै हुनुहुन्छ । सर्वोच्च अदालतले एमाले ब्यूँझाइदिएपछि नेपालको बरियता नेपालको भन्दा अगाडि छ । यसअघि नेकपाका नेपालको बरियता अगाडि थियो ।