काठमाडौं । त्रिकोणात्मक टि–२० सिरिजमा नेपालले लगातार शानदार जित हासिल गरेको छ । आज भएको खेलमा नेपालले मलेसियालाई नौ विकेटले हराउँदै लगातार जित हासिल गरेको हो ।

यसअघि शनिबार भएको खेलमा नेपालले नेदरल्याण्ड्सलाई नौ विकेटले नै हराएको थियो ।

आज कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ गरेको मलेसियाले निर्धारित २० ओभर पनि खेल्न सकेन । उसले १६.५ ओभरमा सबै विकेट गुमाएर १०९ रन मात्र बनाउन सक्यो ।

जवाफी व्याटिङमा आएको नेपालले १२.१ ओभरमा एक विकेट मात्र गुमाएर ११३ रन बनाउँदै लक्ष्य पूरा गरेको हो ।

नेपालको सहज जिका लागि कुशल भुर्तेलले अर्धशतक प्रहार गरेका छन् । उनले ४१ बल खेल्दै अविजित रहँदै ६१ रन बनाएका हुन् ।
कुशलले नेदरल्यान्ड्सविरुद्धको डेब्यु खेलका पनि ६२ रनको अर्धशतकीय पारी खेलेका थिए ।

त्यस्तै, नेपालको जितमा आसिफ सेखले ४२ तथा दीपेन्द्रसिंह ऐरीले ६ रन बनाए । दीपेन्द्र अविजित रहे ।

यसअघि नेपालका बलरहरु हाबी भएपछि मलेसिया सस्तैमा समेटिएको हो । नेपालका लागि करण केसीले तीन तथा सन्दीप लामिछानेले दुई विकेट लिएका छन् । त्यस्तै, सोमपाल कामी, शाहब आलम, कुशल मल्ल र दीपेन्द्रसिंह ऐरीले एक–एक विकेट लिएका छन् ।

लगातारको फराकिलो जितसँगै नेपाल फाइनलनजिक पुगेको छ । अब केवल औपचारिकता मात्रै बाँकी छ ।

नेपालको प्लेइङ ११ :

ज्ञानेन्द्र मल्ल (कप्तान), दीपेन्द्रसिंह ऐरी, विनोद भण्डारी, सोमपाल कामी, करण केसी, सन्दीप लामिछाने, अभिनाश बोहरा, कुशल मल्ल, आसिफ शेख, कुशल भुर्तेल र साहब आलम ।