एजेन्सी - अन्तिम खेलमा एन्गर्सलाई २–१ को जित निकाल्दै लिलेले फ्रेन्च लिग वान फुटबलको उपाधि जितेको छ । जोनथन डेभिडले १० औं मिनेटमा गोल गर्दै लिलेलाई अग्रता दिलाए भने पहिलो हाफको अन्त्यमा बुराक यिल्मजले पेनाल्टीमार्फत अग्रता दोब्बर पारे ।

इन्जुरी समयमा एन्गर्सका एन्जेलो फुलगिनीले खेललाई २–१ को अवस्थामा फर्काए पनि लिलेलाई उपाधि जित्नबाट रोक्न त्यो पर्याप्त भएन ।

लिलेले कुल ८३ अंक जोड्दै लिग जित्यो । उसले फ्रेन्च लिग वान जितेको यो चौथोपटक हो ।

दोस्रो स्थानको पेरिस सेन्ट जर्मेइन (पिएसी)ले ब्रेस्टलाई २–० ले हरायो । तर अंक कम भएकाले दोस्रो स्थानमै सिमित भयो । उसले ८२ अंक जोडेको छ । विगत नौ वर्षमा पिएसजी उपाधिबाट विमुख भएको यो दोस्रो अवसर हो ।

यसअघि तीन संस्करणमा पिएसजीले लगातार उपाधि जितेको थियो । यो वर्ष लिलेले पिएसजीको बर्चस्व तोडेको छ ।

विजेता लिले र उपविजेता पिएसजीसँगै सँगै तेस्रो स्थानमा रहेको मोनाको पनि च्याम्पियन्स लिगका लागि छनोट भएको छ ।

अन्तिम खेलमा लेन्ससँग गोलरहित खेलेको मोनाकोले ७८ अंक थियो । यता, नाइससँग ३–२ ले पराजित भएपछि ७६ अंकमै खुम्चिएको लियोनले चौथो स्थानमै रहेर लिग टुंग्यायो । फ्रेन्च लिगबाट शीर्ष तीन क्लब च्याम्पियन्स लिगमा छानिन्छन् । .