काठमाडौं - कोरोना भाइरस महामारी नियन्त्रणमा सहयोगस्वरुप सरकारले उपलब्ध गराएको स्वास्थ्य सामग्री आज नेपाल आइपुग्यो । १ सय १२ थान भेन्टिलेटरसहितका स्वास्थ्य सामाग्री आज काठमाडौंस्थित त्रिभुवन अन्तर्राष्ट्रिय विमानस्थल आइपुगेको हो ।

नेपालका लागि जर्मनीका राजदूत रोनाल्ड स्याफरले आज विमानस्थलमा ती स्वास्थ्य सामाग्री स्वास्थ्यमन्त्री शेरबहादुर तामाङलाई हस्तान्तरण गरे ।
जर्मनीले उपलब्ध गराएको भेन्टिलेटरसहित ५ वटा आइसोलेसन टेन्ट, २० लाख ६८ हजार ५ सय केएन ९५ मास्क, ४ सय गमबुट, २९ हजार पल्स अक्सिमिटर छन् ।

त्यस्तै, ३ करोड ३० लाख सर्जिकल मास्क र २५ हजार लिटर ह्याण्ड स्यानिटाइजर पनि आज हस्तान्तरण गरिएको हो ।

युरोपेली संघको बृहत इयू सोलिडारिटी प्याकेजअन्तर्गत ती सामग्री आएको स्वास्थ्य मन्त्रालयले जनाएको छ ।
स्वास्थ्य सामाग्री टर्किस एयरलाइन्सबाट नेपाल ल्याइएको हो ।