काठमाडौं- नेपाली काँग्रेसका बरिष्ठ नेता रामचन्द्र पौडेलले काँग्रेस सभापति तथा प्रधानमन्त्री शेरबहादुर देउवालाई सरकारलाई प्रभावकारी बनाउन केन्द्रीत हुन आग्रह गर्नु भएको छ ।

उहाँले सरकारमा पूर्ण रुपमा केन्द्रीत भएर पार्टी संचालनको जिम्मेबारी अरु नेतालाई दिन पनि सभापति देउवालाई सुझाव दिनुभएको छ ।

नेपाली रेडियो नेटवर्कको नेपाली बहसमा उहाँले भन्नुभयो, “सभापति देउवाजी अव पुर्ण रुपमा सरकारमा केन्द्रीत हुनुर्पछ र पार्टी चलाउन अरुलाई दिनुपर्छ, नत्र पार्टी र सरकार दुवै प्रभावकारी हुदैन ।”

बरिष्ठ नेता पौडेलले सकेपनि नसकेपनि सवै पद र जिम्मेबारी आफै लिने प्रबृत्तिका कारण नजिता राम्रो आउन नसकेको टिप्पणी पनि गर्नुभयो ।

“बाचुन्जेल पदमा बसिरहने र आफु हुन नसकेपछि छोरा नातीलाई बनाउने प्रबृत्ति लोकतान्त्रीक हुन सक्दैन,” उहाँले पत्रकार ऋषि धमलासँगको कुराकानीका क्रममा भन्नुभयो ।

बरिष्ठ नेता पौडेलले विपी कोइराला, गिरिजाप्रसाद कोइराला, सुशिल कोइरालासहितका पार्टीका पूर्व सभापतिहरुको असल उत्तराधिकारी आफु हुनसक्ने दावी समेत गर्नुभयो ।

“म उहाँहरुले अपनाएको बाटोमा निरन्तर छु, त्यसैले म पनि कोइराला परिवारकै हुँ, म नै उहाँहरुको उत्तराधिकारी हुँ, उहाँहरुको विरासीत मैले बोक्न सक्छु,” बरिष्ठ नेता पौडेलले भन्नुभयो ।

उहाँले काँग्रेसलाई लोकतन्त्रको पाठशाला बनाउन चाहेको बताउदै भातृ संगठनहरुको अधिवेशन समयमा नभएर पार्टी भित्र लोकतन्त्र र संगठन संकटमा परेको उल्लेख गर्नुभयो ।