काठमाडौँ । सत्ता गठबन्धनको सरकारले बजेट सच्याउने भएको छ । सोमबार बालुवाटारमा बसेको सत्ता गठबन्धनको बैठकले ओली सरकारले अध्यादेशमार्फत ल्याएको आर्थिक बर्ष ०७८\०७९ को बजेट सच्चाउने निर्णय गरेको हो ।

प्रधानमन्त्रीको सरकारी निवास बालुवाटारमा बसेको बैठकमा आवश्यक कानुन बनाएर बजेट परिमार्जन गर्न सत्ता गठबन्धनका नेताहरुले प्रधानमन्त्री शेरबहादुर देउवालाई सुझाव दिएका हुन् ।

बैठकमा सहभागी कांग्रेस नेता पूर्णबहादुर खड्का अनुसार मन्त्रिमण्डललाई चाँडो पूर्णता दिनेबारे पनि छलफल भएको छ ।गठबन्धनका सबै पार्टीका सचेतकहरु बसेर प्रतिवेदन तयार गर्ने र त्यसका आधारमा गठबन्धन अगाडि बढ्ने निर्णय भएको उनले जानकारी दिए।
बैठकमा सरकारले अहिलेसम्म गरेका कामको समीक्षा गरेको खड्काको भनाइ छ।