काठमाडौं । अखिल नेपाल फुटबल संघ (एन्फा) को केन्द्रीय कार्यसमिति निर्वाचनका लागि बुधबार दिउँसोसम्म दुई अध्यक्षसहित ४३ जनाको उम्मेदवारी दर्ता भएको छ ।

६ असारमा हुने चुनावमा अध्यक्ष पदका लागि कर्माछिरिङ शेर्पा र पंकजविक्रम नेम्वाङले आ आफ्नो समूह सहित उम्मेदवारी दर्ता गराइसकेका छन् । 

यस्तै, वरिष्ठ उपाध्यक्षमा शेर्पा प्यानलबाट शिक्षित पराजुलीले उम्मेदवारी दर्ता गराउँदा नेम्वाङ प्यानलबाट विरबहादुर खड्काले आज उम्मेदवारी दर्ता गराए ।

उपाध्यक्ष पदका लागि शेर्पा प्यानलका उपेन्द्रमान सिंह, दीर्घबहादुर केसी, रत्नकुमार श्रेष्ठ र विज्ञानराज शर्माको उम्मेदवारी परेको छ । यता, उपाध्यक्ष पदका लागि नेम्वाङ प्यानलबाट सुन्दरनरसिंह जोशी, विराटजंग शाही, दावा लामा र दीपक खतिवडाले उम्मेदवारी दर्ता गराएका छन् ।

यसैगरी सदस्य पदका लागि शेर्पा र नेम्वाङ दुवै प्यानलसँगै स्वतन्त्र गरी ३१ जनाको खुल्लातर्फ र चार जनाको महिला सदस्यमा उम्मेदवारी परेको छ ।

१३ जनाको खुला सदस्यका लागि हालसम्म भरत बुड थापा, दिपेन्द्र धिमाल, भोजराज शाही, अनिल मल्ल, रविन्द्र चन्द, मानदेव हजरा, तपेश्वर कुमार राउत कुर्मी, मणिराज विष्ट, मणिकुमार लिम्बू, अनिल श्रेष्ठ, दीपक थापा क्षेत्री, रामराज गुरुङ, लोकेन्द्र गुरुङ, प्रदेश सिंह राठोर, रुपेश अधिकारी, टिकाराम लामा, विनोद लामा तामाङ, रमेश कुमार श्रेष्ठ, शम्भु बहादुर सिंह ठकुरी, कुमार कटुवाल, प्रविण कमार यादव, कृष्ण मुरारी गुरुङ, रमेश व्यन्जनकार, मिलन गुरुङ, विजय घले, नेपाल कार्की, विकास नारायण श्रेष्ठ, महेन्द्र क्षेत्री, पुरुषोतम थापा, प्रविण कुमार सुवाल, निरोज खड्गीको उम्मेदवारी परेको छ ।

यस्तै, दुई महिला सदस्यका लागि सरिता श्रेष्ठ, बिन्द्रा देवान, विमला पौडेल र विना श्रेष्ठले उम्मेदवारी दर्ता गराएका छन् । यसबाहेक, फ्रेन्ड्स क्लबका राजीव पौडेलले पत्रकार सम्मेलनमार्फत अध्यक्ष पदमा उम्मेदवारी दिने घोषणा गरे पनि हालसम्म दर्ता गराएका छैनन् ।

आगामी चार वर्षे कार्यकालका लागि ६ असारमा एक अध्यक्ष, एक वरिष्ठ उपाध्यक्ष, चार उपाध्यक्ष, १३ खुल्ला सदस्य र दुई महिला सदस्य गरी २१ सदस्यीय कार्यसमितिका लागि निर्वाचन हुँदै छ ।

एन्फा केन्द्रीय निर्वाचनका लागि १४ वटा ‘ए’ डिभिजन क्लब, १४ मध्ये ११ ‘बी’ डिभिजन क्लब र १४ मध्ये ९ ‘सी’ डिभिजन क्लब, खेलाडी संघ, प्रशिक्षक संघ, महिला र रेफ्री संघ र राष्ट्रिय लिगका लागि छनोट भएर दुई वर्षदेखि खेल्न नपाइरहेका मोफसलका चार क्लबले भोट हाल्न पाउनेछन् ।