काठमाडौं । काठमाडौं महानगरपालिका वडा नम्बर १५ का अध्यक्ष ईश्वरमान डंगोलले फोहोर व्यवस्थापन नहुन्जेल आफूले बैठक भत्ता नलिने बताउनुभएको छ ।
काठमाडौंका नवनिर्वाचित मेयर बालेन शाहले आज राखेको नगर कार्यपालिका बैठकमा बोल्दै वडाध्यक्ष डंगोलले बैठक भत्ता नलिने बताउनुभयो ।
‘फोहोर व्यवस्थापन नभइरहेको अवस्थामा यो बैठकको भत्ता म लिन्नँ,’ उहाँले भन्नुभयो, ‘यो नोट गर्नुहोला। फोहोर व्यवस्थापन नभएको कारण म बैठक भत्ता लिन्नँ। पछि बैंक खातामा भत्ता भनेर नपठाउनुहोला।’
डंगोल वडा नम्बर १५ मा यसपालि तेस्रो पटक अध्यक्ष निर्वाचित हुनुभएको हो । उहाँ नेकपा एकीकृत समाजवादीबाट उम्मेदवार भई वडाध्यक्ष हुनुभएको थियो।
उहाँले फोहोर व्यवस्थापनमा महानगरले जोड दिनुपर्ने बताउनुभयो । कुहिने र नकुहिने फोहोरको बेग्लाबेग्लै व्यवस्थापन पहिलेदेखि गर्दै आए पनि फोहोर व्यवस्थापन गर्न नसकिएकोले नयाँ ढङ्गले सोच्नुपर्ने बेला आएको उहाँको भनाइ छ।
