काठमाडौं । नेकपा एमालेका सांसद नारायण प्रसाद खतिवडाले फोहोर व्यवस्थापनको नाममा नुवाकोटका जनतमाथि प्रहरी दमन भएको बताउनुभएको छ ।

बिहीबार प्रतिनिधि सभा बैठकको शून्य समयमा बोल्दै उहाँले नुवाकाटका जनतामाथि अन्याय भएको बताउनुभयो ।

‘यही जेठ महिनाको २४ र २५ गते नुवाकोटको ककनी र धादिङको धुनिवेशीको बीचमा बञ्चरेडाँडामा फोहोर व्यवस्थापन गर्ने निहुँमा नुवाकोटे जनतामाथि प्रहरी दमन भएको उहाँको दाबी छ ।

काठमाडौं महानगरपालिकाका प्रमुख बालेन्द्र साहले हालै सम्पन्न स्थानीय तह चुनावमा लौरो चिन्हमा चुनाव लड्नुभएको थियो । साह काठमाडौं महानगरको प्रमुख भएपछि फोहोर व्यवस्थापनको नाममा नुवाकोटका जनतामाथि लौरो बजारिएको खतिवडाको भनाइ छ ।

‘फोहोर व्यवस्थापनको नाममा १७ वर्ष अगाडिदेखि नुवाकोटमा जुन वेथिती भएको छ त्यसको व्यवस्थापन गरेर, स्थानीय जनताको जायज माग सुनेर त्यो पुरा गरेर फोहोर व्यवस्थापन गर्ने व्यवस्था होस्,’ सांसद खतिवडाले भन्नुभयो ।