काठमाडौं । नेपाल राष्ट्र बैंकका पूर्व गभर्नर डा. चिरञ्जीवी नेपालले गभर्नर महाप्रसाद अधिकारीबारे आइरहेका कुराको स्पष्ट भइनसकेकाले अहिले नै केहि भन्न नसकिने बताउनुभएको छ ।

उहाँले भन्नुयभयो, ‘नेकपा एमाले पार्टीले पनि यसलाई स्पष्ट गर्ला, कि स्वयम् गभर्नर अधिकारीलाई थाहा होला कि, सम्बन्धित पार्टीलाई थाहा होला ।’ बाहिर सुनेको मात्रै भएर पूर्ण थाहा र प्रस्ट भइनसकेकाले यो बारेमा केहि भन्न नसकिने नेपालको भनाइ छ ।

पूर्वगभर्नर नेपालले राष्ट्र बैंककै ऐन मै कुनै पनि राजनीतिक दलसँग सम्बन्धित भएको व्यक्ति अयोग्य भनेर लेखिएकाले अहिले उठिरहेका कुरा र व्यक्ति एकै नहुन सक्ने बताउनुभयो ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै पूर्व गभर्नर नेपालले भन्नुयो, ‘एम अधिकारी भन्ने को हो यो कुराको प्रमाणित गर्ने कि स्वयम् व्यक्ति हो, कि पार्टी हो । किन भने नेपाल राष्ट्र बैंकको ऐन मै कुनै राजनीतिक दलसँग सम्बन्धित भएको व्यक्ति गभर्नर हुन मिल्दैन, अयोग्य ठहरिन्छ भनेर लेखिएकै छ । त्यसकारण बाहिर आएका कुरा नहुन सक्छ । तर कुरा उठिसकेपछि स्पष्ट पार्ने पारिदिनुपर्छ, एम अधिकारलाई बाहिर ल्याउनुपर्‍यो ।

महाप्रसाद अधिकारीको बर्खास्तीको माग आइरहेको प्रसंगमा पूर्वगभर्नर नेपालले सम्बन्धित व्यक्तिले मै हुँ भनेर प्रस्ट पारिदिएपछि यस्ता सबै कुराकामा आएका माग र समस्याहरु समाधान हुने बताउनुभयो ।

आफू पनि गभर्नर हुनुपूर्व नेपाली कांग्रेसमा आवद्ध रहेको उल्लेख गर्दै पूर्वगभर्नर नेपालले नियुक्ती हुनुअगाडि आफूले सबैबाट राजीनामा दिएकाले अधिकारीले पनि एमाले छोडिसकेकोे हुनसक्ने संकेत गर्नुभयो तर यसबारेमा सम्बन्धित व्यक्ति र पार्टीले क्लियर गरिदिनुपर्नेमा उहाँले आग्रह गर्नुभयो ।