काठमाडौं । साफ यू–२० च्याम्पियनसिपका लागि नेपाली टिमको कप्तानी आयुष घलानले गर्ने भएका छन् ।
राष्ट्रिय टिमबाट खेलिसकेका अनुभवी भएकाले उनलाई कप्तान बनाउने तयारी एन्फाले गरेको हो । यसको आधिकारिक घोषणा भने शुक्रबार एन्फाले गर्ने बिदाइ कार्यक्रममा गरिनेछ ।
सिनियर राष्ट्रिय टोलीबाट खेलिसकेका आयुष घलानसहित ए डिभिजनमा खेलेका कृतिश रत्न छुञ्जु, मनग्य नकर्मी, आशिष् राई लगायत खेलाडी टिममा छन् ।
अन्तिम चरणमा छानिएको टोलीमा एक परिवर्तन गरिएको छ । फरवार्ड दिपेश राई घाइते भए पश्चात् उनको ठाउँमा रोहित सुब्बालाई राखिएको छ ।
नेपालले च्याम्पियनसिपको पहिलो खेल ११ साउनमा श्रीलङ्कासँग खेल्नेछ । त्यस्तै दोस्रो खेल १५ साउनमा भारत तथा १७ साउनमा बङ्गलादेशसँग खेल्नेछ । सिङ्गल राउण्ड रोविनको खेलपछि अङ्कतालिकामा शीर्ष दुईमा रहने टोलीले २० साउनमा फाइनल खेल्नेछन् । नेपाली टिम शुक्रबार ३ बजे भारत प्रस्थान गर्ने छ ।
