काठमाडौं । महिला साफ फुटबल च्याम्पियनसिपमा सहभागी हुन भुटानको राष्ट्रिय महिला फुटबल टोली नेपाल आइपुगेका छन् । भुटानको टोली बिहीबार(आज) बिहान भुटान एयरलाइन्सको विमानबाट नेपाल आइपुगेका हुन् ।
भुटानी टोलीलाई अखिल नेपाल फुटबल संघ (एन्फा) का पदाधिकारीले स्वागत गरेका थिए । महिला साफ खेल्न नेपाल आउने भुटान पहिलो टिम हो । भुटान समूह ‘बी’ मा रहेको टोली हो । यो समूहमा श्रीलंका र नेपाल रहेका छन् ।
भदौ २१ देखि असोज ३ गतेसम्म आयोजना हुने महिला साफ काठमाडौंमा हुँदै छ । प्रतियोगितामा नेपाल सहित ७ टिमले प्रतिस्पर्धा गर्ने तालिका रहेको छ । भर्खरै प्रतिबन्धमा परेको भारतीय टिमको सहभागिता अनिश्चित छ ।
