काठमाडौं । राष्ट्रपति विद्यादेवी भण्डारीले नागरिकता विधेयक १५ दिन पुग्दा पनि प्रमाणीकरण नगरेपछि प्रधानमन्त्रीसहित सत्ता गठबन्धनका शीर्ष नेता राष्ट्रपति निवास पुगेका छन्।

प्रधानमन्त्री शेरबहादुर देउवासहित गठबन्धनका शीर्ष नेता र मन्त्रीहरु केहीबेर अघि शितलनिवास पुगेका हुन्। संघीय संसदका दुवै सदनबाट पास भएर गएको नागरिकता विधेयक राष्ट्रपतिले प्रमाणीकरण गर्नुभएको छैन ।

दोस्रो पटक पारित भएर आएपछि १५ दिनभित्र प्रमाणीकरण गर्नुपर्ने संवैधानिक व्यवस्था छ। संघीय संसद सचिवालयले भदौ २० गते राष्ट्रपति कार्यालयमा विधेयक प्रमाणीकरणका लागि दर्ता गराएको थियो । यो हिसाबले आज १५ दिन पुगेको संसद सचिवालयको हिसाब छ। तर राष्ट्रपतिका सल्लाहकार टीका ढकाल भने विधेयक दर्ता भएको १५ दिन नपुगेको बताउनुभयो ।

उहाँका अनुसार भोलि राष्ट्रपतिको कार्यालयले नागरिक विधेयक प्रमाणीकरण बारेको सूचना दिनेछ।