काठमाडौं। एमालेको भ्रातृ संगठन राष्ट्रिय युवा संघ नेपालले आज सुन प्रकरणविरुद्ध मशाल जुलुस निकाल्ने भएको छ। त्रिभुवन अन्तर्राष्ट्रिय विमानस्थल भन्सार कार्यालयबाट चेक जाँच गरेर बाहिर निकालिएको तस्करीको सुनविरुद्ध युवा संघले राँके जुलुसको तयारी गरेको हो।

सुन तस्करी काण्डमा साना भरियाहरुलाई समातिएको तर ठूलालाई उन्मुक्ति दिने प्रपञ्च रचिएको भन्दै संघले खबरदारीको निम्ति मशाल जुलुस निकाल्न लागेको जानकारी दिएको छ। 

उसले भनेको छ,‘कानुन सबैको निम्ति बराबर हुनुपर्छ।’ मशाल जुलुस साँझ ६ बजे नयाँ बानेश्वरस्थित संघको कार्यालयबाट निकाल्ने तयारी गरिएको हो ।