काठमाडौं । सुदूरपश्चिम, कर्णाली र लुम्बिनी प्रदेशका उच्च पहाडी भू–भागमा हिमपात र वर्षा भएको छ । आज बिहानदेखि सुदूरपश्चिमको बाजुरा, कर्णालीको हुम्ला र मनाङलगायत ठाउँमा हिमपात भएको हो ।

हिमपातका कारण अत्यधिक चिसो बढेको छ । हिमपात भएसँगै आवतजावतमा समेत कठिनाइ भएको छ । हिमपातले जनजीवन कष्टकर भए पनि किसान भने बालीनालीलाई राम्रो हुने भन्दै खुशी भएका छन् ।

केही ठाउँमा हल्का वर्षासमेत भएको छ । सुर्खेत र दैलेख आसपासमा गए रातिदेखि नै पानी परेको स्थानीय बासिन्दाले बताएका छन् ।

लुम्बिनी र सुदूरपश्चिम प्रदेशलगायत गण्डकी र कर्णाली प्रदेशका पहाडी भू–भागका एक–दुई स्थानमा छिटपुट वर्षा भइरहेको मौसम पूर्वानुमान महाशाखाले जनाएको छ ।

महाशाखाका अनुसार आज दिउँसो लुम्बिनी प्रदेशलगायत गण्डकी र कर्णाली प्रदेशका पहाडी भू–भागका एक–दुई स्थानमा हल्का वर्षाको सम्भावना छ।

यता काठमाडौंमा समेत चिसो बढेको छ । काठमाडौंमा आज घाम लागेको छैन । हाल देशमा उत्तर प्रदेशको आसपासमा रहेको न्यून चापीय क्षेत्र तथा पश्चिमी वायुको आंशिक प्रभाव रहेको छ ।