काठमाडौं । त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख, प्रहरी नायव महानिरीक्षक अर्जुन चन्दको सरुवा भएको छ । गृहमन्त्रालयले डीआईजी चन्दलाई प्रहरी प्रधान कार्यालयमा सरुवा गरेको हो ।

केही दिन अगाडि अन्तर्राष्ट्रिय विमानस्थलमा प्रहरी कर्मचारी र अध्यागमन कार्यालयका अधिकृतबिच हातपात भएको थियो ।

सो घटनामा प्रहरी कर्मचारीलाई दोषी देखाइएपछि डीआईजी चन्दले राजीनामा दिनुभएको थियो । पछि उहाँले राजीनामा फिर्ता लिएर काममा फर्कने बताउनुभएको थियो ।

चन्द राजीनामापत्र फिर्ता लिएर केही दिनका लागि बिदामा बस्नुभएको छ । बिदामा बसेकै बेला उहाँको सरुवा भएको हो ।