२०८३, श्रावण १० गते
- यो साता चर्चामा :
काठमाडौँ – प्रधानमन्त्री केपी शर्मा ओलीले संसदीय प्रणालीमा प्रधानमन्त्रीले संसद विघटन गर्न पाउने जिकिर गर्नुभएको छ । संविधानमा जे उल्लेख भए पनि काम गर्न दिइएन भने प्रधानमन्त्रीले संसद विघटन गर्न पाउने ओलीको दाबी थियो ।
आज आफ्नो समूहको जनसभालाई काठमाडौँमा सम्बोधन गर्दै ओलीले लिखित संविधान नभएको देश बेलायतमा पनि हालै प्रधानमन्त्रीले संसद विघटन गरेर निर्वाचन गराएको बताउनुभयो ।
संविधान नहुँदा त प्रधानमन्त्रीले संसद विघटन गर्न मिलेका अवस्थामा नेपालमा संसद विघटनको बहसलाई बलजफ्ती ठूलो पारिएको ओलीको आरोप छ । उहाँले आफैले प्रयास गरेर संसदमा छिराइएका व्यक्तिहरुले कामै गर्न नदिएपछि संसद विघटन गरेर ताजा जनादेशमा जाने निर्णय लिन बाध्य भएको बताउनुभयो ।
बेलायतको उदाहरण दिएर संसदीय प्रणालीमा प्रधानमन्त्रीले संसद विघटन गर्न पाउने दाबी गरिरहँदा ओलीले नेपालको संविधान अनुसार आफूले संसद विघटन गरेको दाबी गर्नुभएन ।
यस अर्थमा ओलीले संसद विघटनको कदम संविधान विपरीत रहेको भनेर आफैले स्वीकार गरेको रुपमा बुझ्न सकिन्छ ।
यता प्रधानमन्त्रीलाई मन लागेका बेला संसद विघटन गर्न पाउने प्रावधान बेलायतमा पनि नरहेको जानकारहरुले बताएका छन् । यस्तो कुरा गरेर प्रधानमन्त्रीले नेपाली जनतामा फेरि पनि भ्रम छर्ने प्रयास गरेको वरिष्ठ अधिवक्ता दिनेश त्रिपाठीले बताउनुभयो ।
प्रधानमन्त्रीले चाहेका खण्डमा संसद विघटन गर्न पाउने प्रावधान बेलायतबाट पनि हटिसकेको उहाँले बताउनुभयो । सन २०११ सम्म त्यो प्रावधान भए पनि अहिले बेलायतमा प्रधानमन्त्रीले संसद विघटन गर्न दुईतिहाई बहुमतबाट पास गर्नुपर्ने प्राबधान रहेको उहाँले जानकारी दिनुभयो ।
आजको सभामा प्रधानमन्त्री ओलीले देशले निर्वाचन मागिरहेको भन्दै आफैले नाराबाजी समेत गर्नुभएको थियो । ओलीले केही व्यक्तिहरुले केपी ओलीले राजतन्त्र फर्काउन थालेको भनेर भ्रम छरिरहेको बताउँदै संघीय लोकतान्त्रिक गणतन्त्रात्मक व्यवस्थालाई कसैले तलमाथि गर्न नसक्ने दाबी गर्नुभयो । उहाँले बलिदान दिएर ल्याएको व्यवस्थालाई बलियो पार्दै लाने बताउनुभयो ।
यसअघि आजको सभामार्फत ओलीले नेपाललाई हिन्दु राष्ट्र बनाउने र संघीयता खारेज गर्ने घोषणा गर्न सक्ने अनुमान विभिन्न तहबाट भएको थियो ।
कतिपयले त राजतन्त्र फर्काउने घोषणा पनि ओलीबाट हुन सक्ने हल्ला पिटेका थिए । यो हल्लाबाट सबैभन्दा धेरै संघीयता विरोधी र राजावादीहरु हौसिएका थिए । तर आज नारायणहिटी अगाडिबाट ओलीले गरेको भाषण सुनपछि उनीहरु निराश भएका छन् ।
ओलीको भाषण सुनेपछि राप्रपाका नेता मोहन श्रेष्ठले अब भ्रममा बस्न नहुने बताउनुभएको छ ।
उहाँले फेसबुकमा लेख्नुभएको छ, ‘आफ्नो तागत निर्माण गर्ने बेला घरभित्र बसेर आन्दोलनलाई धारे हात लगाउने र नेतृत्वलाई बदनाम गर्न समय र शब्द खर्चनेहरु कसैले हिन्दुराष्ट्र र राजसंस्थाबारे महत्त्वपूर्ण घोषणा गरिदिन्छन् भन्ने ठूलो भ्रममा थिए ।‘ बेलैमा सोचेर एकजुट हुन ढिला नगरौँ, आफैले सामर्थ्य निर्माण गरौँ।’
