काठमाडौं – टर्की युरोपियन च्याम्पियनसिप (युरोकप) फुटबलबाट बाहिरिने दोस्रो टोली बनेको छ । गएराति भएको समूह चरणको अन्तिम खेलमा स्विट्जरल्यान्डसँग ३–१ पराजित हुँदै टर्की युरोकपबाट बाहिरिने दोस्रो टाली बनेको हो ।

अजरबैजानको बाकु ओलम्पिक स्टेडियामा समूह एअन्तर्गतको सो खेल सुरु भएको छैटौं मिनेटमै ह्यारिस सेफेरोभिचको गोलमार्फत स्विटजरल्यान्डले अग्रता लिएको थियो ।

२६ औं मिनेटमा जद्रान शाकिरीले अग्रता दोब्बर बनाए । ६२ औं मिनेटमा यान काभाचिले गोल गर्दै टर्कीलाई खेलमा फर्काउने प्रयास गरेका थिए । तर ६८ औं मिनेटमा शाकिरीले ब्यक्तिगत दोस्रो गोल गरेपछि स्विटजरल्यान्डले ३–१ को जित हात पार्दै महत्वपूर्ण तीन अंक बटुल्यो ।

युरोकपको  समूह चरणबाट बाहिरिने टर्की दोस्रो टोली हो । यसअघि समूह चरणको पहिलो खेलमा टर्की आयोजक इटालीसँग ३–० ले पराजित भएको थियो । त्यस्तै, टर्की दोस्रो खेलमा वेल्ससँग २–0 ले हारेको थियो ।

त्यसैगरी, एक खेल खेल्नुअगावै नर्थ मेसेडोनिया बाहिरी सकेको छ । युरोकप पहिलोपटक खेलेको नर्थ मेसेडोनिया पहिलो खेलमा अष्ट्रियासँग ३–१ ले पराजित भएको थियो भने दोस्रो खेलमा युक्रेनसँग २–१ ले हारेकोे थियो ।

समूह सीमा रहेको नर्थ मेसेडोनियाले आज नेदरल्याण्डस्को सामना गर्दैछ । यद्यपि, आजको खेल जिते पनि नर्थ मेसेडोनियाको यात्रामा कुन्े असर पर्नेछैन । किनकि, नर्थ मेसेडोनिया हेड टु हेडका आधारमा पछि परिसकेको छ ।