काठमाडौं – एसिड आक्रमणमा परेकाहरुको उपचार अब आजीवन निःशुल्क हुने भएको छ । सरकारले निःशुल्क उपचारका लागि काठमाडौंका चारवटा अस्पताललाई डेडिकेटेड अस्पतालको रुपमा तोकेको छ । अहिलेलाई त्रिवि शिक्षण, वीर, पाटन र किर्तिपुर अस्पताललाई बर्न डेडिकेटेड अस्पताल तोकेको छ ।

यी अस्पतालबाट निःशुल्क उपचारका लागि स्वास्थ्य तथा जनसंख्या मन्त्रालयले जेठ ३१ गतेदेखि लागु हुनेगरी एसिड आक्रमणमा परेका पीडितहरुको उपचारसम्बन्धि कार्यविधी २०७८ जारी गरेको छ ।

कार्यविधीमा कस्मेटिक उपचारबाहेकको अन्य एसिड आक्रमणसँग सम्बन्धित सम्पूर्ण आवश्यक उपचार तथा औषधि खर्च नेपाल सरकारले ब्यहोर्ने उल्लेख छ । मन्त्रालयले २९ भदौ २०७७ को मन्त्रिपरिषद् बैठकको आदेशअनुसार एसिड आक्रमणमा परेका पीडितहरुको निःशुल्क उपचारको संयोजन तथा सहजीकरण गर्न यो कार्यविधि ल्याएको हो ।

एसिड आक्रमण पीडित कुनै पनि स्वास्थ्य संस्थामा सेवा लिन पुगेमा निःशुल्क प्राथमिक एवं आकस्मिक उपचार गर्नुपर्ने तथा ६ महिनाका लागि निःशुल्क घाउमा लगाउने मल्हमसमेत उपलब्ध गराउनुपर्ने व्यवस्था पनि कार्यविधिमा छ ।

उक्त उपचारमा लागेको खर्च सरकारले शोध भर्नाका रुपमा अस्पताललाई उपलब्ध गराउनेछ ।