२०८३, श्रावण ११ गते
- यो साता चर्चामा :
काठमाडौँ – माधवकुमार नेपाल खेमासँगको एकतालाई लिएर नेकपा एमालेको संस्थापन समूहमा मतभेद देखिएको छ ।
असन्तुष्ट समूहसँग कठोर भएर अघि बढ्ने कि हदैसम्मको लचकता अपनाएर एकतावद्ध हुने भन्नेमा ओली समूहभित्र मतभेद देखिएको हो ।
आज बसेको एमाले स्थायी कमिटि बैठकमा पनि माधव समूहसँगको एकताका लागि अपनाउन सकिने उपायहरुबारे छलफल चलेको थियो ।
छलफलमा केही नेताहरुले माधव नेपाललाई प्रधानमन्त्री र एमालेको दोस्रो अध्यक्ष बनाएर एकता जोगिन्छ भने त्यहाँसम्म पुग्नुपर्ने राय व्यक्त गरेका छन् भने केही नेताहरुले यी दुवै प्रस्ताव गर्दा पनि नेता नेपाल एमालेमा नफर्कने जिकिर गरेका छन् ।
स्थायी कमिटि सदस्य पृथ्वीसुब्बा गुरुङले एमाले एकता हुन्छ भने माधव नेपाललाई प्रधानमन्त्री र पार्टीको दोस्रो अध्यक्ष बनाउने स्थितिसम्म पनि पुग्नुपर्ने धारणा राख्नुभयो ।
तर उहाँको यो प्रस्तावमा प्रधानमन्त्री समेत रहनुभएका पार्टी अध्यक्ष केपी शर्मा ओलीसहित निकट अन्य नेताहरुले कुनै प्रतिक्रिया नजनाएको श्रोतले बताएको छ ।
गुरुङले यसअघि पनि विभिन्न अन्तर्वार्ताहरुमा एमाले एकता जोगिने भए माधव नेपाललाई प्रधानमन्त्री र पार्टीको अर्काे अध्यक्ष बनाउँदैमा केही नबिग्रिने बताउँदै आउनुभएको थियो ।
पार्टी अहिले दुर्घटनामा परेको गाडी जस्तै भएकाले सडकमा निस्केर दगुर्नका लागि आवश्यक सबै उपायहरु अबलम्न गरिनुपर्ने नेता गुरुङको तर्क छ ।
एमाले फुटेर शेरबहादुर देउवालाई प्रधानमन्त्री बनाउनु भन्दा एकताका लागि माधव नेपाललाई प्रधानमन्त्री बनाउन तयार हुनुपर्ने गुरुङको धारणा छ ।
हिजो केपी ओलीले जेठ २ मा फर्कनै नमिल्ने अडान लिए पनि एकताका लागि त्यसमा फर्कन सहमत भएसँगै माधव नेपालले पनि लचकता अपनाउनुपर्न उहाँले बताउनुभयो ।
दुवै समूहको जित–जितको अवस्था नखोजिए पार्टी एकता नहुने उहाँले बताउनुभयो ।
गुरुङले माधव नेपाललाई अर्को अध्यक्ष र प्रधानमन्त्री बनाउँदा एकता जोगिन्छ भने त्यहाँसम्म पुग्नुपर्ने सुझाव दिए पनि ओली समूहका अरु नेताहरु यो प्रस्ताव मान्न तयार छैनन् ।
एमाले प्रवक्ता प्रदीप ज्ञवालीले माधव समूहका केही नेताहरुको क्रियाकलाप एकताको वातावरणसँग मेल नखाने बताउनुभयो । आफूहरु एकता हुनेमा आशावादी भए पनि केही नेताहरुको व्यवहार एकताको पक्षमा नरहेको उहाँले बताउनुभयो ।
बढी भन्दा बढी नेताहरुलाई माधव समूहबाट खोसेर संस्थापन समूहमा भित्र्याउने रणनीति ओली समूहले लिएको देखिन्छ ।
प्रवक्ता ज्ञवालीले अधिकांश नेता कार्यकर्ताको चाहना एकतावद्ध एमाले नै रहेको दाबी गर्दै माधव समूहका नेताहरुलाई पनि समेट्ने गरी पार्टी अघि बढ्ने आशय व्यक्त गर्नुभयो ।
असार १६ गते बोलाइएको महाधिवेशन आयोजक समितिको बैठकले एकताको पक्षमा थप निर्णय लिने उहाँले बताउनुभयो ।
संस्थापन एमालेले एकताका लागि पहल गरिरहेको दाबी गरे पनि असन्तुष्ट समूहले भने केपी ओलीसँग सम्झौता गर्न आफूहरु तयार नरहेको यसअघि नै बताइसकेको छ ।
हिजो पत्रकार सम्मेलन गरेर वरिष्ठ नेता माधवकुमार नेपालले आफूलाई प्रधानमन्त्रीको प्रस्ताव आइसकेको खुलासा गर्दै पदको लोभमा नफस्ने बताउनुभएको थियो ।
