काठमाडौं । शिक्षा, विज्ञान तथा प्रविधि मन्त्री देवेन्द्र पौडेलले पाँचदलीय गठबन्धनमा कुनै समस्या नआएको बताउनुभएको छ ।

नेपाली रेडियो नेटवर्कको नेपालीबहसमा पत्रकार ऋषि धमलासँग कुरा गर्दै मन्त्री पौडेलले भन्नुभयो, ‘गठबन्धन भनेपछि अलग–अलग दलको रुपमा उपस्थित भएको हुनाले कहिलेकाहि केहि कुरामा छलफल, शंका र उतारचढाव आउनु स्वभाविक हो तर, गम्भिर रुपमा समस्या केहि छैन । आगामी संघ र प्रदेश दुवै निर्वाचनमा मिलेर जाने तरिकाले गृहकार्य भइरहेको छ ।’

एमालेले भनेर गठबन्धन नभएकाले अहिले एमालेले भनेरै टुट्ने फुट्ने नहुने र आगामी निर्वाचनसम्म कायम रहने मन्त्री पौडेलको दाबी छ । निर्वाचनमा केन्द्रित रहेर अहिले नै छलफल सुरु भइनसकेको मन्त्री पौडेलको भनाइ छ ।

गठबन्धनभित्रका दलहरुको आ–आफ्ना केहि समस्याहरु छन् । तर निर्वाचन तोकिएकै समयमा र गठबन्धनलाई सँगै लिएरै निर्वाचन हुने कुरामा दुईमत छैन । तर अहिले नै सिट बाँडफाट भएको भन्ने कुरा गलत हो । केहि समयमा छलफल गरेर टुङग्याइन्छ ।’ मन्त्री पौडेलले भन्नुभयो ।

निर्वाचनसम्म गठबन्धनलाई लैजानु अहिलेको परिपक्वता र जनताको चाहना भएको मन्त्री पौडेलको भनाइ छ । अर्को फरक प्रसंगमा मन्त्री पौडेलले ९६ प्रतिशत पाठ्यपुस्तक सबै विद्यालयमा पुगिसकेको दाबी गर्नुभएको छ ।

मन्त्री पौडेलले भन्नुभयो, ‘हामीसँग डेटा छ, ९६ प्रतिशत पुस्तक सबै जिल्लमा पुगिसक्यो, पढाइ रोकिएको छैन । शिक्षाक्षेत्र तहसनहस भएको छैन । बजारमा कागज अभाव र स्थानीय तहको निर्वाचनका कारण समय केहि तलमाथि भएको हो तर पाठ्यपुस्तक पुगेनन् भन्ने कुरा साँचो होइन ।'

यस्तै मन्त्री पौडेलले विपक्षीले बाहिर उठाएको जस्तो महंगीको अवस्था भयावह र बर्बादै हुने खालको आफूले नदेखेको स्पष्ट पार्नुभएको छ ।