खेम बम

गुरु म आज घरमै छुँ । विद्यालय किन बन्द छ मलाई थाहा छैन । हिजो त संविधान दिवस भएर बिदा मनायौँ, आज फेरि बिदा । तर, मेरै घरको छिमेकी दाई बिहानै झोला टुमलेट भिरेर बाईबाई भन्दै विद्यालय लागे । हाम्रो मात्रै किन बिदा दिएको होला भनेर बाबालाई सोधेँ, बाबालाई पनि केही थाहा रहेनछ । तपाईंहरु सबै विद्यालय बन्द गरेर काठमाडौं लाग्नुभएको छ रे । राजधानीमा ठूला–ठूला मान्छेहरुसँग तपाईंको भेट हुन्छ होला । हाम्रो विद्यालयको चुहिने छानोको विषयमा पक्कै कुरा होला, डेस्क बेञ्च नभएको कति भयो त्यो पनि कुरा होला । तपाईं फर्किएपछि पक्कै हाम्रो विद्यालयले मुहार फेर्छ होला है !

गाईगोरु डो¥याउँदै चोकको बाटो हिड्दै थिए । सुने तपाईं त आफ्नो अधिकारका निम्ति काठमाडौं जानुभएको हो रे ! ए साच्ची किन गुरु तपाईंलाई कसले के ग¥यो ? तपाईंले पढाएका मेरा काका आज डाक्टर हुनुहुन्छ उतै काठमाडौं बस्नुभएको छ, पल्ला घरका दाजु प्रहरीमा हुनुहुन्छ, उतै काठमाडौंतिर हुनुहुन्छ, गाह्रो परे सबैलाई भेट्नुहोला ल । अधिकार माग्दा पक्कै समस्या आउन सक्छ, आन्दोलनले उग्ररुप लिन सक्छ बचेर बस्नुहोला । गुरु, कक्षालाई निरन्तरता दिनुहुन्थ्यो होला के गर्नु फोन गर्न त रुखमा चढ्नुपर्छ कहाँबाट डाटा, वाईफाई ल्याउनु ?

अनि आज बोर्डिङ स्कूल किन खुलेका छन् हँ ? ए, साच्ची त्यो त हाम्रा माननीयज्यूको स्कूल पो है । अनि सरकारी विद्यालयलाई बलियो बनाउँछौँ, आफ्नो साथ समर्थन छ भन्ने हाम्रा गाउँका नेताहरु आज किन चुप बसेका होलान् ? सरकारी विद्यालय बन्द हुँदा उनीहरुको टाउको दुखेको छैन । दुखोस् पनि कसरी, हाम्रै पालिकाका जनप्रतिनिधिविरुद्धको आन्दोलन रे नी है गुरु ? उहाँहरु विरुद्ध कसरी भयो ? चोकका हल्ला सुन्दै थिए, हाम्रो भनेको नमान्ने रे ? हामीलाई नस्वीकार्ने रे ? हेरौँला भन्दै थिए वडाध्यक्ष काइला ।

ठिकै छ, तपाईंको आन्दोलन सफल होस्, मिलेर आउनु होला । हाम्रो विद्यालयको बारेमा पनि कोही मन्त्री भेटिए कुरा गर्नुहोला । ओत लाग्ने कोठामा बसेर पढ्ने ठूलो रहर छ । बेञ्चमा बस्ने उस्तै रहर छ । यहाँका प्रतिनिधि त अध्यक्ष, सदस्य चयन गर्नमात्रै लाठी भाटा उठाउँछन्, विद्यालयको वृत्तिविकासका लागि केही देखिदैन । भएका बालक्लब सबै बन्द भए । केही नयाँ गर्नुहुन्थ्यो, मन बुझाउन हुन्थ्यो बालमैत्री क्रियाकलाप केही छैन ।

धेरै के लेखौँ र, जे भइरहेको छ राम्रैका लागि होस् ।

(विकट क्षेत्रका विद्यार्थीले लेखेको कल्पनामा आधारित पत्र)