काठमाडौं । जसपा नेपालका नेता राजकिशोर यादवले वर्तमान सरकारले बोले र गरेका कुनै पनि प्रतिवद्धताहरु पूरा नगरेको बताउनुभएको छ ।

नेपाली कांग्रेस र नेकपा एमालेको समिकरणमा सरकार गठन गर्नु अगाडि जे–जे भनिएको थियो त्यो अुनसार अहिलेसम्म एउटा काम पनि हुन नसकेको पूर्वमन्त्रीसमेत रहनुभएका यादवको भनाइ रहेको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता यादवले जनतामा सरकार छ भनेर अनुभुति गराउनका लागि बाढीपहिरोको अवस्थामा सरकार चुकेको समेत आरोप लगाउनुभयो । सरकारबाट पीडितले राहत, उद्धार भन्दा धेरै उपेक्षा पाएको पनि उहाँको तर्क छ ।

जवजव जनता पिडामा हुन्छन् तवतव सरकार टाढिने र पन्छिने यो पूरानै प्रवृती रहेको नेता यादवको भनाइ छ । सरकार र राजनीतिक दलप्रति जनताको निराशा कम नभएर झन् बढिरहेको उहाँले बताउनुभयो ।

देशमा भ्रष्टाचार र बेथिती बढिरहदा पनि दोषिलाई कानुनी दायरामा ल्याउन छाडेर पोस्नमा लागिपरेको आरोप लगाउँदै उहाँले यो सरकारले पनि निराश बनाएको स्पष्ट पार्नुभयो ।

संसदका दुई ठुला दल मिलेर बनेको सरकारबाट सुरुका दिनमा केहि गर्छ की भन्ने आस भए पनि त्यो सबै निरासामा बदलिएको उहाँको भनाइ छ ।