काठमाडौँ – नेपाली कांग्रेसका नेता गगन थापाले राष्ट्रपतिबारे आफूले पनि बोलेको भन्दै राज्यद्रोहको मुद्दा लगाउन चुनौती दिएका छन् ।

विद्यादेवी भण्डारीले राष्ट्रपति पदको गरिमा राख्न नसकेको भन्दै उनले संसद पुनर्स्थापना भएपछि घर पठाउने घोषणा गरे।

राष्ट्रपतिबारे दिएको अभिव्यक्तिलाई लिएर प्रहरीले राज्यविरुद्धको कसुरबारे अनुसन्धानका लागि भन्दै नेकपा प्रचण्ड–माधव समूहकी केन्द्रीय सदस्य रामकुमारी झाँक्रीलाई बिहीबार बिहान पक्राउ गरेको थियो ।

गगनले आफूले पनि राष्ट्रपतिका विषयमा बोलेको बताए । ‘मैले पनि राष्ट्रपतिबारे बोलेको छु, हिम्मत छ भने राजद्रोहको मुद्दा हामी सबैलाई लगाऊ, झ्यालखानाको संख्या अझै बढाऊँ’ उनले अघि भने, ‘महाराजको आदेशले छेकिएन श्रीमान्, तपाईँको आदेशले पनि छेकिन्न ।’

उनले २०६२÷२०६३ को जनआन्दोलनका क्रममा आफू लगायतका विद्यार्थी नेताहरुमाथि राज्यद्रोहको मुद्दा लागेको क्षण सम्झिाए ।

राजाविरुद्ध अमर्यादित नारा लगायो भनेर आफूमाथि मुद्दा लागेको भन्दै उनले भने, ‘मेरो मुद्दामाथि बहस हुँदै गर्दा नेपाल विद्यार्थी संघका साथीहरु अदालत परिसरमा आएर त्यही नारा लगाए, जुन नारा लगाउँदा ममाथि मुद्दा लागेको थियो । मेरो वकिलले भन्नुभयो श्रीमान एकछिन अदालतमा मौनता चाहन्छु । अदालतमा सन्नाटा छायो, तलबाट नारा लागिरहेको थियो । मेरो वकिलले भन्नुभयो श्रीमान गगन थापालाई राजद्रोही भन्ने हो भने यी सबैलाई राजद्रोही भन्नुपर्छ ।’

‘त्यसो भन्ने वलिक को हुनुहुन्थ्यो थाहा छ? सुवास नेम्वाङ हुनुहुन्थ्यो । आज बालुवाटारको दुलोमा लुकेर बस्नुभएको छ’ थापाले अघि भने, ‘श्रीमान्, तपाईँ बदलिनु भयो होला, हामी बदलिएका छैनौँ।’